Вашынгтон паспрабуе размаўляць з Лукашэнкам?

Амерыканскі спецыяльны прадстаўнік у справах Украіны Кіт Келог у бліжэйшыя дні мае прыбыць у Беларусь — з візітам, які ўжо выклікае буру інтэрпрэтацый. Пра гэта паведаміла агенцтва Reuters са спасылкай на чатыры незалежныя крыніцы. Паводле папярэдніх зьвестак, Келог плянуе асабістую сустрэчу з Лукашэнкам.

Што стаіць за гэтай сустрэчай?

Фармальна — ініцыятыва міру. Паводле меркаваньня амэрыканскіх дыпляматаў, паездка Келога — гэта «крок, які можа дапамагчы пачаць мірныя перамовы», скіраваныя на спыненьне вайны Расеі супраць Украіны. ЗША шукаюць новыя шляхі ўплыву — і нават Беларусь могуць паспрабаваць далучыць да «мірнага працэсу».

Фактычна — торг за санкцыі і закладнікаў.Дырэктар Агенцыі эўраатлянтычнага супрацоўніцтва Валер Кавалеўскі дапускае: акрамя ўкраінскага пытаньня, у парадку дня могуць быць і выключна беларускія тэмы — перш за ўсё вызваленьне палітвязьняў у абмен на змякчэньне санкцыяў, спыненьне рэпрэсіяў і аднаўленьне працы амэрыканскай амбасады ў Менску.

Але сцэнар — не ў Менску, а ў Маскве:Раднік Сьвятланы Ціханоўскай Анатоль Лябедзька папярэджвае: сустрэча Келога з Лукашэнкам стане прапагандысцкім трукам. Рэжым паспрабуе падаць яе як доказ «самастойнасьці» Лукашэнкі. Але насамрэч — усе сцэнары зацьвярджаюцца ў Крамлі.

Паводле ацэнкі Лябедзькі, калі візіт увогуле будзе мець нейкі сэнс, дык толькі ў тым выпадку, калі Келог забярэ з сабой каго-небудзь з вязьняў. Гэта мог бы быць рэальны вынік — хай сабе і сціплы на фоне вялікай дыпляматыі.

Падобная спроба палепшыць дачыненьні ЗША з Беларусьсю ўжо была ў 2020 годзе, калі дзяржаўны сакратар Майк Пампео прыляцеў у Менск. Але тады Лукашэнка яшчэ спрабаваў манэўраваць паміж Масквой і Захадам. Цяпер жа ён цалкам пад Крамлём.

Застаецца галоўнае пытаньне: ці не скарыстае рэжым гэты візіт, каб прадаць Захаду чарговую ілюзію — і пазьбегнуць адказнасьці за катаваньні, арышты і падтрымку вайны супраць Украіны?