Беларуская апазіцыя наладжвае адносіны з Украінай

Сёньня ў Кіеве адбываюцца слуханьні ў Вярхоўнай Радзе, у якіх бяруць удзел прадстаўнікі беларускай дэмакратычнай супольнасьці. Дэлегацыя прыбыла ва ўкраінскую сталіцу рана і станоўча ацэньвае перспектывы далейшага супрацоўніцтва.

Галоўная перавага цяперашніх працоўных сустрэч — значна большая вага прадстаўнікоў украінскай улады, якія вядуць перамовы.

«Калі раней беларускім пытаньнем ва Ўкраіне займаліся пераважна апазыцыйныя колы, то цяпер сытуацыя зьмянілася, — лічыць дарадца Сьвятланы Ціханоўскай Анатоль Лябедзька па пытаннях канстытуцыйнай рэформы і міжпарламенцкага супрацоўніцтва ў каментары Радыё Рацыя. — Мінулай восенню ў гэтую групу ўвайшлі 8 дэпутатаў ад партыі і фракцыі «Слуга народа». Сярод іх тры кіраўнікі ўкраінскіх парламенцкіх дэлегацый у найбуйнейшых міжнародных парламенцкіх арганізацыях. Для мяне гэта азначае, што Банкавая падняла ўзровень стасункаў з дэмакратычнай Беларуссю да ўзроўню Вярхоўнай Рады, дзе большасць маюць «слугі».

Акрамя заканадаўчай галіны ўлады значна больш цеснымі сталі стасункі з Адміністрацыяй прэзідэнта Украіны і выканаўчай уладай, адзначаюць беларускія палітыкі.

Падчас цяперашняга візіту запланаваны інтэнсіўныя дыскусіі ў Вярхоўнай Радзе, сустрэчы з парламентарыямі і замежнымі дыпламатамі, а таксама перадача дапамогі беларускім добраахвотнікам.

Асобным пунктам праграмы павінны быць сустрэчы з дыпламатычным корпусам, які працуе ў Кіеве. А ў Львове дэлегацыя беларускіх палітыкаў сустрэнецца з беларускай дыяспарай.