Мікалаю Статкевічу споўнілася 68 гадоў

На жаль, непрымірымы змагар за свабодную Беларусь сустракае 5-ты дзень нараджэння запар у зняволенні.

Статкевіч у пачатку 91-га ў зак пратэсту супраць ужывання войска ў Вільні выйшаў з КПСС, а ў жніўні таго ж года адзіны з беларускіх вайскоўцаў выступіў супраць ДКЧП. Тады ж арганізаваў Беларускае аб'яднанне вайскоўцаў (БОВ), стараўся выкладаць на беларускай мове. У 1992 у гадавіну Бітвы пры Оршы сябры БАВ прымалі грамадзянскую прысягу на вернасць Беларусі.

З прыходам да ўлады лукашэнка Статкевіч уключыўся ў бескампрамісную барацьбу супраць дыктатуры. У чэрвені 95-га быў абраны кіраўніком Беларускай сацыял-дэмакратычнай Грамады.

Мікалай удзельнічаў у арганізацыі ўсіх акцыяў супраць рэжыму лукашэнкі. За адвагу і прынцыповасць карыстаецца аўтарытэтам і павагай усіх беларускіх дэмакратычных сіл.

Быў арыштаваны яшчэ да выбараў 20-га года. У 21-ым атрымаў тэрмін 14 гадоў. Адбывае тэрмін у калоніі ў Глыбокім Віцебскай вобласці ў цяжкіх умовах. Рэжым настолькі ненавідзіць і баіцца Статкевіча, што ўжо больш за 550 дзён пра яго няма ніякай інфармацыі, даўжэй за ўсіх з беларускіх палітвязняў.